Ævintýraþráin enn til staðar

Hlynur Bæringsson var í vikunni valinn besti leikmaður sænsku úrvalsdeildarinnar í körfubolta en hann er ásamt Jakobi Erni Sigurðssyni lykilmaður í deildarmeistaraliði Sundsvall. Hlynur stendur í ströngu með liði sínu þessa dagana en í gærkvöldi tapaði liðið gegn Södertalje Kings í fjórða leik liðanna í úrslitum deildarinnar.

Södertalje leiðir þar með einvígi liðanna, 3-1, og getur tryggt sér meistaratitilinn í næsta leik. Hlynur og félagar í Sundsvall eru þó þekktir fyrir allt annað en að gefast upp.

„Það er alltaf gaman að fá viðurkenningu, sérstaklega í nýju landi og ég hef ekkert nema gott að segja um það,“ sagði Hlynur hógvær í samtali við Fréttablaðið í gær.

Hlynur er á sínu þriðja tímabili í Svíþjóð og stefnir nú á að vinna meistaratitilinn aftur sem liðið vann fyrir tveimur árum. En þessa nafnbót hafði hann aldrei hlotið áður. Hann og Jakob Örn Sigurðarson hafa báðir verið í lykilhlutverki hjá liðinu undanfarin ár.

„Þetta hefur verið einhver vitleysa hin árin,“ sagði hann í léttum dúr. „Annars held ég að varnarleikurinn sé svipaður hjá mér nú og áður. Hann hefur alltaf verið stór þáttur af mínum leik. Ég held þó að ég sé ekki með stærra varnarhlutverk en aðrir í liðinu enda reynum við að sinna varnarvinnunni saman. Við erum duglegir að víxla og oft endum við leiki á að verjast öðrum mönnum en við byrjuðum á.“

Aldrei vesen á okkur

Sundsvall varð deildarmeistari í vor með talsverðum yfirburðum og segir Hlynur að tímabilið hafi gengið vonum framar. „Við tókum til dæmis þrettán sigurleiki í röð og þetta rann mjög þægilega í gegn. Við vorum heppnir með Kana sem pössuðu vel inn í liðið okkar. Það var því eiginlega aldrei neitt vesen á okkur,“ segir Hlynur.

Sundsvall lenti ekki í vandræðum í fyrstu umferð úrslitakeppninnar og hafði svo betur gegn Pavel Ermolinskij og félögum í Norrköping í undanúrslitunum. Hann segir að Sundsvall og Södertälje séu með tvö bestu lið deildarinnar í ár.

„Södertälje er með mjög taktískt sterkt lið og lang agaðastir af þeim liðum sem við höfum spilað við í vetur. Það er mikil harka í þessu liði og þeir eru fljótir að brjóta. Það er allt öðruvísi að spila við þá en öll önnur lið í deildinni.“

Kann vel við öryggið

Hlynur segir að sér líki vel við lífið í Sundsvall utan körfuboltans og bæði sér og fjölskyldu sinni líði eins og þau séu heima hjá sér.

„Auðvitað söknum við ættingja og vina á Íslandi en okkur líður mjög vel hér. Við þekkjum orðið allt hérna og svo skemmir ekki fyrir að liðinu hefur gengið mjög vel.“

Hlynur á enn tvö ár eftir af samningi sínum við félagið og sér því ekki fram á að söðla um á næstunni. Hann viðurkennir þó að hann sé opinn fyrir öllu.

„Stundum langar manni í nýja áskorun. Ævintýraþráin er enn til staðar. Það eru kostir og gallar við öryggið því inn á milli væri maður til í að vera frjáls og prófa eitthvað nýtt. En yfirleitt er ég nú mjög sáttur við að hafa öryggið,“ segir Hlynur.

„Ég á kannski enn eitthvað eftir þegar að þessum samningi lýkur.“

Þarf að byggja upp stöðugleikaFyrir stuttu var tilkynnt að Peter Öqvist yrði áfram landsliðsþjálfari Íslands en hann er einnig þjálfari Sundsvall og hefur verið undanfarin ár.

„Það var rökrétt framhald mála enda þurfa lið sem ætla að ná árangri að byggja upp stöðugleika,“ segir Hlynur Bæringsson. „Ég er reyndar lítið að hugsa um landsliðið núna en það eru vonandi spennandi tímar fram undan þar. Þetta lofar góðu.“

Öqvist er með lausan samning hjá Sundsvall og óvíst hvort hann verði áfram þar. „Hann er búinn að vera hér í tíu ár og er spenntur fyrir því að prófa sig í sterkari deild.“