Enn ein meiðslin í landsliðinu

Hildur Þorgeirsdóttir meiddist á æfingu íslenska landsliðsins í gær og verður frá næstu vikurnar.

Ágúst Þór Jóhannsson landsliðsþjálfari sagði við Vísi í morgun að hún væri óbrotin en í fyrstu var óttast að meiðslin væru slæm. Hún verði líklega frá keppni næstu 4-5 vikurnar.

Ísland lék þrjá æfingaleiki gegn Sviss um síðustu helgi og spilar tvo æfingaleiki við U-16 lið karla um helgina. Ljóst er að Hildur mun missa af þeim leikjum.

Alls hafa nú fjórir leikmenn landsliðsins meiðst eftir að það kom saman til æfinga fyrir skömmu. Rut Jónsdóttir meiddist á öxl, Stella Sigurðardóttir fékk högg á augað og Rakel Dögg Bragadóttir heilahristing eftir að hafa fengið skot í höfuðið á æfingu.