Lengi dreymt um fulla Höll

Peter Öqvist, þjálfari íslenska körfuboltalandsliðsins, var byrjaður að tala um töfrakvöld (magical night in Reykjavík) í lok leiks á móti Búlgaríu á dögunum þegar stefndi í stórtap og afar slæma stöðu íslenska liðsins. Sigur Rúmena í Búlgaríu um helgina breytti hins vegar öllu og nú dugar Jóni Arnóri Stefánssyni og félögum í íslenska landsliðinu að vinna tvo síðustu leiki sína í Laugardalshöllinni til þess að tryggja sér sigur í riðlinum. Sá fyrri er á móti Búlgaríu klukkan 19.15 í kvöld.

„Fyrsti leikurinn var smá áfall fyrir okkur og það var alltof mikill munur á liðunum. Við erum enn þá á lífi eftir síðustu úrslit og það er mjög ánægjulegt að Rúmenarnir hafi tekið þá. Rúmenarnir voru slakari en ég hélt þegar þeir mættu okkur. Ég var eiginlega búinn að afskrifa það að þeir gætu unnið Búlgara og það kom því skemmtilega á óvart að þeir unnu,“ segir Jón Arnór.

„Það var stefnan hjá okkur að við ættum möguleika á einhverju þegar kæmi að þessum síðustu tveimur leikjum, sérstaklega af því að við erum á heimavelli í þeim báðum. Það er bara allt opið og ég tel að menn þurfi að setja sig í þann gír að trúa því að við getum unnið og sjá þetta fyrir sér,“ segir Jón Arnór.

Það er þó annað en að segja það að leggja Búlgara að velli í Höllinni í kvöld, enda fóru þeir illa með íslenska liðið undir körfunni í fyrri leiknum í síðustu viku. Liðið þarf því góðan stuðning á áhorfendapöllunum.

Þurfum okkar besta dag

„Það hefur vantað kannski og ég vona að áhorfendur mæti nú á svæðið og styðji við bakið á okkur. Það væri auðvitað rosalega mikilvægt af því að Búlgarar eru með mjög gott lið.

Við þurfum klárlega okkar besta dag og góðan stuðning til þess að eiga möguleika. Við vorum farnir að gíra okkur upp í 30 stiga sigur í Laugardalshöllinni og það er svolítið langsótt á móti svona góðu liði. Nú þurfum við bara að vinna með einu og áfram gakk, við erum klárir í þetta,“ segir Jón Arnór en þeir mæta hávöxnu og öflugu liði.

„Þeir eru mjög sterkir inni í teig, einmitt þar sem við erum hvað veikastir með fullri virðingu fyrir Hlyni og öllu því sem hann gerir. Ef við sleppum við villuvandræði og náum að gera það sem við leggjum upp varnarlega á móti þessum stóru köppum þá hugsa ég að þetta geti orðið spennandi leikur,“ segir Jón Arnór.

Jón Arnór Stefánsson hefur leikið tólf landsleiki í Höllinni en aldrei fyrir fullu húsi.

„Sá draumur lifir alltaf og vonandi sér maður það nú áður en maður fer að hætta þessu. Það væri rosalega skemmtilegt að sjá það gerast en það er ekkert grín að fylla Höllina og það þarf margt fólki til þess. Það eru þá mörg skref fram á við frá því í leikjunum í sumar,“ segir Jón Arnór léttur en það er alltaf von á að fólk fjölmenni, ekki síst þegar svona mikið er undir.

„Magical night in Reykjavík“

„Eigum við ekki að hafa trú á því. Rúmenarnir unnu Búlgara á útivelli, sem var ótrúlegt, og svo sjáum við til hvort það verði annað kraftaverk á morgun og við fyllum Höllina,“ segir Jón Arnór og brosir þegar hann er minntur á orð þjálfarans Peter Öqvist í leikhléi í Búlgaríu, þegar Svíinn fór að tala um „magical night in Reykjavík“.

„Tökum við ekki út eitt svoleiðis á morgun. Í Reykjavík, hjá okkar fólki og vonandi nokkuð full höll af körfuboltafólki. Það verður bara geðveikt. Við sjáum þetta fyrir okkur. Eins og Óli bróðir segir þá þarf að byrja á því að sjá hlutina fyrir sér. Við höfum vonandi verið að gera það síðan að Rúmenarnir unnu Búlgarana,“ sagði Jón Arnór.

Aðeins unnið einn landsleik í Höllinni

Jón Arnór Stefánsson á flottan feril fullan af frábærri tölfræði en það er ein tölfræði sem verður seint talin frábær.

Hann hefur nefnilega aðeins unnið einn af tólf landsleikjum sínum í Laugardalshöllinni og tapað báðum bikarúrslitaleikjunum sem hann hefur spilað í Höllinni.

„Ég hef ekki unnið marga leiki í Höllinni þegar þú nefnir það. Mér þykir samt vænt um Höllina, þó að ég hafi tapað þar á móti Stjörnunni í bikarúrslitaleik og eigi sárar minningar líka frá því á móti Njarðvík í bikarúrslitaleik.

Ég er samt hrifinn af Höllinni og ber miklar tilfinningar til hennar. Mér finnst rosalega skemmtilegt að spila í Höllinni,“ segir Jón Arnór.

Hann segir sérstaka tilfinningu fylgja því að spila í Laugardalshöllinni og mikið stolt.

Það er heldur ekki eins og Jón hafi ekki verið að skila sínu í þessum tólf landsleikjum, enda með 16,8 stig að meðaltali í þeim.