Þrenn pör af nýjum skóm fyrir sumarið

Stefán Svan Aðalheiðarson, tískuspekúlant og fagurkeri, segir í nýútkominni tískuhandbók Nýs Lífs að þrenn ný skópör séu nauðsyn í fataskápinn fyrir sumarið. „Þú þarft þrenn pör af nýjum skóm. Töff strigaskó með þykkum botni, támjóa hælaskó með lágum eða háum hælum og lága leðurskó með herrasniði.“ Í handbókinni er farið vel ofan í saumana á straumum og stefnum tískunnar í sumar.

Stefán segir litagleðina verða við völd. ,,Neon- og pastellitir eru allsráðandi og gaman er að blanda þeim saman við brúna og náttúrulegri liti. Einnig eru sportáhrif ákaflega áberandi, háskólabolir, jersey-efni og laskaermar svo eitthvað sé nefnt.“

Mynstur í ýmsum útfærslum verða einnig vinsæl. „Því meira mynstur, því betra. Blandaðu saman mystrum eða notaðu sama mynstrið frá toppi til táar. Fyrir þá sem treysta sér ekki alveg í það, mæli ég með að velja eina sterka mynstraða flík og para saman með látlausari. Dýramynstur eru ennþá sterk og þá helst hlébarðamynstur“, segir Stefán.

Augljóst er að mikið tískusumar er í vændum. Í handbók Nýs Lífs má finna margvísleg tískutengd ráð þar sem komið er inn á litapalletur og samsetningar, auk fallegra myndaþátta þar sem lesandinn fær að sjá það fallegasta úr búðum borgarinnar.