Balotelli sektaður fyrir að reykja inn á klósetti

Mario Balotelli og félagar í AC Milan náðu bara 2-2 jafntefli á móti Fiorentina í ítölsku deildinni í dag þrátt fyrir að spila manni fleiri í 50 mínútur en Balotelli tókst að koma sér í vandræði í lestarferðinni til Flórens.

Gazzetta dello Sport segir að lestarvörður hafi komið að Mario Balotelli þar sem hann var að reykja inn á klósetti lestarinnar en það er stranglega bannað.

Adriano Galliani, framkvæmdastjóri AC Milan, sagði við blaðamann Gazzetta dello Sport að Balotelli yrði sektaður vegna hegðunar sinnar.

Balotelli tókst ekki að skora í leiknum en hann er búinn að skora sjö mörk í átta leikjum síðan að hann kom til AC Milan frá Manchester City.

Balotelli leitaði uppi vandræðin hjá Manchester City en þetta var í aftur á móti í fyrsta sinn sem hann kemur sér í vandræði utan vallar síðan að hann komst aftur heim til Ítalíu.