Framtíð gagnanna er skrifuð í skýin

Síðustu misseri hefur tölvuheimurinn að miklu leyti snúist um „skýið“, það er að í stað þess að geyma gögn og vinna með þau á netþjónum eða hörðum diskum innan veggja fyrirtækja og heimila eru þau staðsett á miðlægum netþjónum.

Nú bjóðast fjölmargar lausnir í þessum málum þar sem geymslurými eykst stöðugt samhliða því að verð lækkar. Einstaklingar og heimili geta nýtt sér þessa möguleika til að geyma gögn, til dæmis ljósmyndir og myndbönd, til að tryggja sig fyrir að týna gögnum þegar harðir diskar í tölvum hrynja eða þeim er jafnvel stolið. Auk þess gerir geymsla í skýinu notendum kleift að nálgast gögnin sín hér um bil hvar sem er, jafnvel í farsímum og spjaldtölvum.

Margir bjóða nú upp á þjónustu sem hægt er að tengja við margar tölvur og síma og samstilla þannig gögnin sín. Þá er hægt að búa svo um hnútana að til dæmis allar þær myndir sem eru teknar á myndavél snjallsíma hlaðist sjálfkrafa í varamöppu í skýinu.

Best þekkta þjónustan í þessum geira er sennilega Dropbox, sem býður upp á tveggja gígabæta geymslurými endurgjaldslaust. Þó er hægt að bæta talsvert við sig í rými með því að mæla með þjónustunni með vinum og kunningjum auk þess sem námsfólk getur fengið talsvert meira pláss. Þá bjóða risarnir Microsoft, Google og Apple upp á sínar lausnir, en nú er mest af ókeypis geymsluplássi í boði hjá SurDoc, þar sem boðið er upp á 100 gígabæta geymslupláss í eitt ár, en eftir það mun það kosta 30 Bandaríkjadali, sem jafngildir innan við 5.000 krónum á ári fyrir sama gagnarými.

Bara tímaspursmál

Ísland á sinn fulltrúa í skýjaheimum, sem er sprotafyritækið Greenqloud. Tryggvi Lárusson, þróunarstjóri fyrirtækisins, segir að þeir hafi hingað til einbeitt sér að lausnum fyrir fyrirtæki, en þeir hafi nú gefið út neytendavöru í líkingu við þær sem um er getið hér áður, QloudSync að nafni, sem er þó  enn í beta-útgáfu fyrir Windows-kerfi, sem leyfir fólki að afrita gögnin sín í skýið með einföldum hætti.

Spurður hvort þetta sé það sem koma skuli fyrir einstaklinga segir Tryggvi að svo sé. Nú sé aðaláherslan á að gera þessar lausnir auðveldari og öruggari fyrir notendur. Harðir diskar muni brátt heyra sögunni til.

Hann segir aðspurður að óhætt sé að treysta því að geyma gögn á vefnum.

„Yfirleitt eru mjög sterkar öryggisvarnir byggðar í þessar lausnir og flestar verja þær sig gagnvart gagnatapi með því að geyma gögnin á fleiri stöðum en einum samtímis. Það er margfalt öruggara en að vera með allt á einum hörðum diski sem tengdur er við tölvuna. Svo er hraðinn að aukast og verðið á þjónustunni lækkar á hverju ári, þannig að í dag eru þær jafnvel orðnar ódýrari en að kaupa sér harðan disk.“

Varðandi framhaldið segist Tryggvi viss um að í fyllingu tímans muni skýið taka við af hörðum diskum. „Það er bara spurning um tíma.“