Eyjamenn senda erlendu leikmennina sína heim

ÍBV hefur ákveðið að senda heim erlenda leikmenn félagsins í Olís-deild karla í handbolta en þetta kemur fram í tilkynningu frá handknattleiksdeild ÍBV.

ÍBV komst í dag að samkomulagi við serbnesku skyttuna Filip Scepanovic og slóvenska línumanninn Matjaz Mlakar um að rifta samningi þeirra við félagið.

Leikmennirnir komu til félagsins fyrir yfirstandandi keppnistímabil og léku 9 leiki. Filip Scepanovic skoraði þrettán mörk í þessum níu leikjum og Matjaz Mlakar var með ellefu mörk.  

Íslensku strákarnir hafa verið í aðalhlutverki hjá Eyjaliðinu því bæði Andri Heimir Friðriksson og Theodór Sigurbjörnsson hafa skorað mera en 43 mörk og Róbert Aron Hostert var með 37 mörk í 7 leikjum áður en hann meiddist.

ÍBV-liðið er í 4. sæti deildarinnar með 10 stig en liðið hefur tapað tveimur af síðustu þremur leikjum sínum.