Er Gattuso svindlari?

Ítalski harðjaxlinn Gennaro Gattuso gæti verið í vondum málum en hann er nú grunaður um að hafa tekið þátt í að hagræða úrslitum knattspyrnuleikja.

Rannsóknin snýst um leiki í ítölsku úrvalsdeildinni fyrir þrem árum síðan. Fjórir aðrir hafa verið teknir haldi í tengslum við málið. Þar á meðal er Christian Brocchi, leikmaður Lazio.

Saksóknari heldur því fram að þeir hafi haft áhrif á úrslit leikja undir lok tímabilsins 2010-11.

Hinn 35 ára gamli Gattuso hefur lagt skóna á hilluna og var rekinn sem þjálfari Palermo eftir aðeins sex leiki.

Hann vann tvo Ítalíumeistaratitla og einnig vann hann Meistaradeildina tvisvar á þrettán ára ferli með AC Milan.