Gott gengi Hellas Verona heldur áfram

Hellas Verona skellti Bologna 4-1 á útivelli í dag í ítölsku A-deildinni í fótbolta. Emil Hallfreðsson lék sex síðustu mínútur leiksins fyrir Hellas Verona.

Fabrizio Cacciatore skoraði fyrsta mark leiksins fyrir Hellas Verona á 22. mínútu. Sjö mínútum síðar bætti Juan Iturbe öðru marki við og þar við sat í hálfleik.

Alessandro Diamanti minnkaði muninn á 52. mínútu en fjórum mínútum síðar kom Luca Toni Hellas Verona aftur tveimur mörkum yfir.

Emil Hallfreðsson kom inn á sem varamaður á 84. mínútu og níu mínútum síðar eða á þriðju mínútu uppbótartíma skoraði Jorginho fjórða mark Hellas Verona.

Hellas Verona er í fimmta sæti deildarinnar með 13 stig en Bologna er í næst neðsta sæti deildarinnar með 3 stig.