Handaþegi í klemmu í Lyon

Guðmundur Felix Grétarsson, er nú í sérkennilegri stöðu sem helst má kenna við Catch 22.

Guðmundur Felix missti handleggina og slasaðist lífshættulega þegar hann fékk ellefu þúsund volta rafstraum í gegnum sig og féll átta metra niður á frosna jörð 12. janúar 1998, er nú staddur í Lyon í Frakklandi þar sem hann undirbýr sig fyrir aðgerð sem miðar að því að handleggir verði græddir á hann. En, hann fékk undanþágu frá gjaldeyrislögum til að kaupa evrur fyrir söfnunarfé en gallinn er sá að hann fær ekki að flytja féð úr landi.

"Þetta skýrist vonandi á morgun þegar ég næ í einhverja lögfræðinga hjá Seðlabankanum," segir Guðmundur Felix. Hann er staddur tímabundið í leiguíbúð í Lyon meðan hann er að leita sér að húsnæði. "En til að vera með húsnæði hérna þarf ég að vera með franskan bankareikning og tryggingu. Og til að geta flutt peninga úr landi þarf ég að vera með lögheimili hérna. Þannig að ég get ekki fengið íbúðina af því að ég er ekki með peninginn og get ekki fengið peninginn af því að ég er ekki með íbúðina."

Guðmundur segir að aðgerðin sé fyrirhuguð í september en það fer vitaskuld eftir því hvort þá verði til staðar gjafi sem hentar. Guðmundur Felix er að reyna að koma sér inn í tungumálið og menninguna. Aðgerðin mun kosta um 100 til 150 þúsund Evrur, sem eru 25 milljónir króna og endurhæfingin árlega mun kosta annað eins.

Viðbrögð Seðlabankans við vandræðum Guðmundar eru þau að þó bankinn geti ekki tjáð sig um málefni einstakra aðila ... "þá virðist ljóst að einhver misskilningur er á ferðinni. Viðkomandi þyrfti að hafa samband við gjaldeyriseftirlit Seðlabankans til að leysa úr málinu."