Engin fýla í nýjum morgunþætti FM957

„Við ætlum aðallega að vera hressir,“ segir tónlistarmaðurinn Sverrir Bergmann.

Hann og félagi hans, Ólafur Þór Jóelsson úr sjónvarpsþættinum Geimtíví, stjórna nýjum morgunþætti útvarpsstöðvarinnar FM957 sem hefst klukkan 7 á föstudaginn.

„Við förum yfir málefni dagsins, verðum með liðinn "Eitís for the ladies" og við fáum fólk í heimsókn og spjall. Þetta verður hefðbundinn morgunþáttur en með okkar stíl,“ segir Sverrir, sem kvíðir ekkert fyrir því að vakna eldsnemma á morgnana.

„Ég prófaði þetta í morgun [gærmorgun]. Þetta var fínt. Það er miklu betra veður, enginn á ferðinni og svo er maður búinn fyrir hádegi. Þetta verður bara flott, held ég, nema kannski á meðan úrslitakeppnin í NBA stendur sem hæst.“

Aðspurður segir Sverrir skipta miklu máli að hafa Ólaf Þór með sér í settinu, enda hafa þeir starfað saman í áratug í Geimtíví. „Við þekkjum hvor annan vel. Við getum látið vel í okkur heyra án þess að annar hvor okkar fari í fýlu.“

Yngvi Eysteinsson hefur undanfarið staðið morgun vaktina á FM957. Hann tók á sínum tíma við af morgunþættinum Magasín. Undanfarar Magasíns voru þættirnir Villta vestrið og Svali og félagar.