Heiðra Michael Jackson í Hörpu

Í september verður sett á svið sýning í Hörpu til heiðurs Michael Jackson undir nafninu „The M.J. Experience". Öllu verður til flaggað til að gera viðburðinn sem glæsilegastan, en opnar prufur verða haldnar fyrir dansara og annað hæfileikafólk næstu helgi. Hluti af ágóða sýningarinnar mun renna til krabbameinssjúkra barna.

Alan Jones, söng- og dansari, mun fara með hlutverk Jacksons.  Þetta verður ekki í fyrsta sinn sem Alan bregður sér í líki popparans, en hann hefur sungið lög Jacksons við ýmis tækifæri í gengum tíðina. „Ég hef verið að leika MJ bæði á Akureyri og í Keflavík. Fólk bara elskar það, sérstaklega krakkarnir. Ég held að Harpa sé fullkominn vettvangur fyrir svona viðburð“, segir Allan. Sýningin mun fara fram í Kaldalóni sem tekur 150 manns í sæti. „Ef vel tekst til langar okkur svo að fara með sýninguna um landið“, segir Alan.

Sýningin verður byggð á kvikmyndinni „This Is It" sem kom út skömmu eftir andlát  Jacksons. ,,Þetta eru sömu lögin og sama uppbygging. Vonandi verður þetta eins og Michael Jackson sjálfur mæti í Hörpu“, segir Allan, sem verður  með átta manna hljómsveit og barnakór sér til halds og trausts á sviðinu. „Við erum að leita að dönsurum og öðru hæfileikafólki til að gera þetta enn meira dramatískt og magnað, en Helga Ólafsdóttir sem var í Dans, dans, dans verður mín hægri hönd í því vali.“

Þeim sem hafa áhuga á að spreyta sig í áhernaprufunum er bent á að fylgjast með á fésbókarsíðu The MJ Experience.