Fimm mörk Klose á 40 mínútum

Þýski landsliðsmaðurinn Miroslav Klose skoraði fimm mörk á fjörutíu mínútum þegar Lazio tók Bologna í kennslustund í ítölsku knattspyrnunni í gær.

Pólskættaði Þjóðverjinn skoraði fyrsta markið á 21. mínútu og eftir það héldu Rómarborgurum engin bönd. Klose er fyrsti leikmaðurinn í sögu Lazio sem skorar fimm mörk í Serie A.

Enginn hefur skorað fimm mörk í einum leik í Serie A síðan Roberto Pruzzo var í stuði árið 1986 með Roma. Lazio er í áttunda sæti deildarinnar 28 stigum á eftir Juventus sem er ítalskur meistari.

Klose er eini leikmaðurinn í sögunni sem hefur skorað fimm mörk eða fleiri á tveimur heimsmeistaramótum í knattspyrnu í röð.