Ólafur Bjarki á leið til Lemgo

Ólafur Bjarki Ragnarsson, leikstjórnandi þýska b-deildarliðsins Emsdetten og íslenska landsliðsins, er á leiðinni í þýsku úrvalsdeildina á næsta tímabili því vefsíðan handbolti.org hefur heimildir fyrir því að Ólafur Bjarki sé búinn að gera samkomulag um að spila með Lemgo á næstu leiktíð.

Ólafur Bjarki varð Íslandsmeistari með HK á síðasta tímabili og er á sínu fyrsta tímabili með Emsdetten-liðinu en hann hefur reyndar verið talsvert meiddur á þessu tímabili og missti meðal af HM á Spáni með íslenska landsliðinu.

Ólafur Bjarki gerði bara eins árs samning við Emsdetten og samkvæmt frétt handbolti.org skrifar hann annaðhvort undir eins eða tveggja ára samning á næstu dögum.

Ólafur Bjarki verður ekki fyrsti íslenski leikmaðurinn hjá Lemgo en með liðinu hafa meðal annars spilað Sigurður Valur Sveinsson, Logi Geirsson, Vignir Svavarsson og Ásgeir Örn Hallgrímsson.