Umfjöllun og viðtöl: Grótta - Fram 21-32 | Fram mætir Val í úrslitum bikarsins

Fram vann afar sannfærandi ellefu marka sigur, 21 - 32, á Gróttu í seinni undanúrslitaleiknum Símabikarsins í Laugardalshöllinni í dag. Það verða því Valur og Fram sem mætast á morgun í úrslitaleik Símabikarsins.

Leikurinn var jafn og spennandi til að byrja með og liðin skiptust á skora og jafna. Á 15 mínútu leiksins var staðan 5 – 5 og markmenn beggja liða búnir að eiga ágætis spretti fyrir sín lið. Þá gáfu stelpurnar úr Safamýrinni í og byrjuðu að spila grimma vörn sem skilaði sér í hverju hraðarupphlaupinu á eftir öðru. Forystan jókst jafnt og þétt og endaði hálfleikurinn 8 – 15 fyrir Fram og þægilegur sjö marka munur staðreynd.

Fram hélt uppteknum hætti í upphafi seinni hálfleiks og leikurinn var vægast sagt óspennandi. Grótta átti aldrei möguleika og Safamýrastelpur bættu við forystuna hægt og rólega. Birna Berg Haraldsdóttir og Stella Sigurðardóttir voru virkilega öflugar fyrir Fram og skoruðu sjö mörk hvor eða saman um helming marka Fram. Fram er með virkilega vel spilandi lið og því má segja að það verði hálfgerður drauma úrslitaleikur þegar þær taka á móti Val. Fram er með stóran og breiðan hóp og það skilaði þessum sigri ásamt miklum tæknifeilum Gróttu.

Halldór: Þægilegt að hafa breiðan hóp„Við bjuggust alveg hörkuleik og að þær myndu gefa allt í þetta sem og þær gerðu. Lið Gróttu er á uppleið þannig að við vissum að við þyrftum að taka leikinn mjög alvarlega og á fullum krafti. Við unnum leikinn á 10 mínútna kafla í fyrri hálfleik og ég er virkilega ánægður með þann kafla hjá okkur,“ sagði Halldór Jóhann Sigfússon, þjálfari Fram eftir leikinn.

„Leikurinn var gríðalega jafn í upphafi en þá setti ég Steinunni Björnsdóttir í miðjuna í vörnina hjá okkur og þetta small, þannig að það er þægilegt að hafa breiðan hóp og geta gert svona breytingar ef manni finnst eitthvað vanta upp á.

„Leikurinn á morgun verður bara stál í stál, gömlu Reykjavíkurstórveldin mætast. Við verðum bara að taka þann slag, þegar maður er kominn í úrslit í bikar er þetta bara helmingslíkur. Sá leikur mun ráðast á fleiri fráköstum, fleiri vörðum boltum og færri feilsendingum og öllu því, gamla klisjan. Liðin eru mjög jöfn Valur og Fram, Valsstelpurnar eru gríðalega vel mannaðar en við ættum að eiga góðan möguleika á móti þeim ef við mætum vel skipulögð og á fullu.“ sagði Halldór að lokum.

Sunna María Einarsdóttir var öflugust í liði Gróttu með níu mörk og átti fínan leik og það hefði mátt koma meira frá fleiri leikmönnum Gróttu í þessum leik.

Sunna: Það er alltaf fúlt að tapa„Við er auðvitað mjög svekktar en að sama skapi mjög ánægðar með það að komast í undanúrslitin í Höllinni. En það kom þarna 7-0 kafli hjá þeim í fyrri hálfleik sem slóg okkur alveg út af laginu,“ sagði Sunna María

„Við áttum að vera mun ágengari í vörninni á móti þeim og gera mun færri tæknifeila ásamt því að fleiri leikmenn þurftu að skila sínu fyrir félagið. Við köstuðum boltanum svona tíu sinnum í hendurnar á þeim sem skilaði sér ótal mörgum hraðaupphlaupum í bakið á okkur“

„Fram og Valur eru vissulega sterkustu liðin á landinu en hin liðin eiga alveg að geta strítt þeim. En ef við spilum eins og við gerðum í dag eigum við ekki séns í þau, það er alveg ljóst“

„Það er alltaf fúlt að tapa og ég veit ekki hvernig stemningin er inn í klefa núna en þetta fer í reynslubankann“. Sagði Sunna að lokum