Berlusconi biður Balotelli afsökunar

Hinn litríki eigandi AC Milan, Silvio Berlusconi, fór ekki fögrum orðum um landa sinn, Mario Balotelli, á kjöri knattspyrnumanns ársins hjá FIFA.

"Ég hef aldrei hugsað um að fá Balotelli til Milan. Hann er rotið epli og getur smitað hvaða hóp sem er. Meira að segja Milan," sagði Berlusconi sem er ekki vanur að skafa utan af því.

Kallinn sér eftir þessum orðum í dag og hefur nú beðið Balotelli afsökunar.

"Það sem ég var að meina er að okkur vantar jákvætt fólk í búningsklefann. Ég var ekki að tala um Balotelli og biðst afsökunar ef hann tók þetta til sín," sagði Berlusconi og bætti við að enginn hjá Milan hefði rætt við Balotelli um að koma til félagsins.