Ökumenn stöðvuðu bíla sína og slógust

Til handalögmála kom á milli tveggja ökumanna í Reykjavík í gær. Annar maðurinn taldi hinn hafa ekið gróflega í veg fyrir sig svo að lá við árekstri. Sá sem taldi að á sér hefði verið brotið ýtti þá á flautuna en uppskar í framhaldinu fingurinn frá hinum. Sá síðarnefndi ók hægt áfram en stöðvaði síðan bílinn. Sá sem á eftir kom átti því ekki um annað að velja en gera slíkt hið sama. Þegar hér var komið sögu var báðum mönnunum orðið heitt í hamsi.

Þeir yfirgáfu bílana til að ræða málið, en svo fór að mennirnir slógust út af áðurnefndu atviki. Samkvæmt upplýsingum frá lögreglunni var annar aumur eftir og sagðist vera með nokkrar rispur eftir áflogin en viðkomandi hugðist leggja fram kæru. Hinn viðurkenndi sinn hlut í málinu, en sagði jafnframt að það væri hinum alveg jafnmikið að kenna.