Grikkir merkja 30 milljón evrur fyrir kappakstursbraut

Birgir Þór Harðarson skrifar 3. október 2012 15:00

Sífellt bætist í hóp þeirra landa sem vilja halda Formúlu 1-kappakstur. Það verður þó seint sem kappakstur verður haldinn á möl. David Coulthard fékk að kynnast því þegar hann ók um þá fyrirhugaða braut í Texas sem nú er tilbúin. nordicphotos/afp

Samsteypustjórnin í Grikklandi hefur eyrnamerkt 30 milljón evrur kappakstursbraut sem þeir hyggjast byggja. Vonir eru bundnar við að geta einn daginn haldið grískan kappakstur á brautinni.

Eins og kunnugt er hafa Grikkir ekki verið í neinum afbragðs málum undanfarin ár og hefur alþjóðlega efnahagskreppan komið illa við þá. Evrópusambandið hefur þurft að leggja til fé til þess eins að landið fari ekki á hausinn.

Samkvæmt þróunarráðuneyti Grikklands, verður brautin byggð nærri Patras í vestur-Grikklandi og þriðja fjölmennasta þéttbýli landsins. Samanlagður kostnaður við byggingu brautarinnar er áætlaður vera 94,6 milljónir evra. Það mun svo vera einkahlutafélagið Racetrack Patras SA sem annast framkvæmdina.

Grikkir sjá greinilega tækifæri í því að halda alþjóðlegan kappakstur. Tekjurnar af kappakstrinum gætu orðið þó nokkrar enda laðar Formúla 1 aðdáendur allstaðar að úr heiminum.

Heimsmeistararallið heimsækir Grikkland árlega. Grikkir hafa þó aldrei átt ökumann í Formúlu 1.

Formúla