Tæmdi tankinn og þakkaði fyrir sig

„Takk fyrir,“ voru skilaboðin sem blöstu við Sigríði Örnu Arnþórsdóttur þegar hún fór út af heimili sínu í Garðabæ í gærmorgun og hugðist setjast upp í bíl. Þau voru frá þeim sem um nóttina hafði stolið öllu bensíninu af bílnum.

„Hann opnaði bensínlokið algjörlega án ummerkja, tæmdi bensíntankinn og skrifaði svo í héluna á rúðunni: Takk fyrir. Svo dundaði hann sér við að taka Nissan-merkið af bílnum að aftanverðu og skrifaði líka þar fyrir ofan: Takk fyrir,“ segir Sigríður Arna.

Hún komst út á næstu bensínstöð á dropunum sem eftir voru í tankinum, en segir það hafa staðið tæpt.

„Að sjálfsögðu er þetta tjón, en það hefði getað verið miklu meira,“ segir Sigríður, hissa og nokkuð sátt við natni þjófsins sem ekki hafði rispað lakkið á bílnum eða valdið á honum tjóni að öðru leyti en að hafa fjarlægt Nissan-merkið. „Það eru tíu til fimmtán þúsund krónur af bensíni farnar en bíllinn er að minnsta kosti snyrtilegur og vel umgenginn.“ - sh