Íslendingar sýni Malölu stuðning

„Sendu Malölu stuðningskveðju. Láttu Malölu vita að umheimurinn styður mannréttindabaráttu hennar," segir í nýjasta netákalli Amnesty sem hugsað er til stuðnings pakistönsku stúlkunni sem var skotin í höfuðið af Talibönum vegna mannréttindabaráttu hennar.

Malala Yousufzai er 14 ára pakistönsk stúlka sem hóf snemma að berjast fyrir mannréttindum, tjá sig um réttindi kvenna til menntunar og fleira. Hún hefur síðan sætt hótunum Talibana. Þann 9. október var reynt að myrða hana vegna skoðana hennar. Talibani skaut hana um borð í skólabíl þar sem hún var á leið heim frá skóla. Hún liggur nú þungt haldin á sjúkrahúsi í Brighton.

Amnesty international hérlendis vill koma þeim skilaboðum til stúlkunnar að umheimurinn styðji baráttu hennar og þess vegna gefst Íslendingum nú kostur að skrifa undir netákall til að sýna stúlkunni stuðning. Hér má taka þátt í netákallinu.

Í leiðara Fréttablaðsins í dag var fjallað um baráttu stúlkunnar. Þar kemur fram að þó enn sé með öllu óljóst um hver afdrif Malölu verði muni aldrei takast að þagga niður í henni. Hún er nú orðin táknmynd í baráttunni fyrir réttindum allra til menntunar þó hún sé ung að árum. „Það er fólk eins og Malala sem veltir hlössum í baráttunni fyrir betra lífi á jörðinni," segir í leiðaranum.