Skjalasafnið fyllir 8.000 öskjur

Samband íslenskra samvinnufélaga (SÍS) afhendir Þjóðskjalasafni Íslands skjalasafn sitt til varðveislu í dag. Safnið er gríðarmikið vöxtum og geymir frumheimildir um merkilegan kafla í sögu 20. aldar á Íslandi.

Á fréttavefnum Vikudegi segir frá því að eftir að safnið hafði um árabil verið varðveitt í Héraðsskjalasafni Þingeyinga á Húsavík var því komið fyrir í flutningabíl sem flytur það suður yfir heiðar.

Skjalasafn Sambandsins er mikið að vöxtum og er stærsta einkaskjalasafn sem afhent hefur verið Þjóðskjalasafni til varðveislu. Samtals er skjalasafnið um 600 hillumetrar að stærð, eða rúmlega 8.000 skjalaöskjur, segir í frétt Vikudags.

Elstu skjölin í skjalasafninu er frá síðari hluta 19. aldar og þau yngstu frá síðustu aldamótum. Skjalasafnið er mikilvægt þegar kemur að rannsóknum á sviði viðskipta, atvinnu og stjórnmála. Eftir vinnu við röðun, uppsetningu í hillur og frágang skjalaskrár verður skjalasafn Sambandsins aðgengilegt almenningi og fræðimönnum snemma árs 2013. - shá