Fimm mánaða fangelsis krafist

Dómstólar Farið hefur verið fram á fimm mánaða fangelsisrefsingu og þriggja ára ökuleyfissviptingu vegna fjölmargra afbrota þrítugs Kópavogsbúa síðastliðið ár eða svo. Þá er krafist 673 þúsund króna í málskostnað. Mál á hendur manninum var þingfest í Héraðsdómi Reykjavíkur í gær.

Maðurinn, sem er af erlendu bergi brotinn, kom hingað til lands fyrir um einu og hálfu ári síðan. Hann hefur hins vegar ekki slegið slöku við í afbrotum eftir komuna til landsins.

Í ákæru á hendur honum eru talin upp átta þjófnaðarbrot, þar sem um er að ræða margvíslegan þjófnað úr verslunum á höfuðborgarsvæðinu, hylmingu yfir þjófnaðarbrotum annarra og hlutdeild í tilraun til innbrots hjá fyrirtæki í Reykjavík.

Hann er einnig kærður fyrir brot á ávana- og fíkniefnalöggjöfinni þar sem heima hjá honum fundust 2,18 grömm af marijúana.

Þá er hann kærður fyrir tíu umferðarlagabrot. Þar á meðal er ítrekaður akstur undir áhrifum amfetamíns og kannabisefna, hraðakstur og margítrekaður akstur án ökuréttinda.

Maðurinn játaði öll brotin þegar málið var tekið fyrir í gær. - óká