Þyngri og seinteknari Sudden

Hljómsveitin Sudden Weath-er Change vakti mikla athygli fyrir fyrstu plötuna sína, Stop! Handgrenade In The Name of Crib Death? understand? sem kom út árið 2009 og var meðal annars útnefnd bjartasta vonin á Íslensku tónlistarverðlaununum árið á eftir.

Nú, þremur árum eftir frumburðinn, er önnur plata hljómsveitarinnar í fullri lengd, Sculpture, komin út.

Eins og á fyrri plötunni er tónlistin á Sculpture gítarrokk með auðheyranlegum bandarískum áhrifum.

Þetta er samt ólík plata. Lagasmíðarnar á Sculpture eru þyngri og hljómurinn er dimmari. Sándið á plötunni er sérstaklega flott, en Ben Frost og Þorbjörn G. Kolbrúnarson sáu um upptökustjórnina.

Sculpture er töluvert seinteknari heldur en Stop! Handgrenade?? en hún er síst verri. Þessi níu lög eru mislengi að koma til manns, fyrsta lagið Weak Design virkar til dæmis strax frá fyrstu hlustun á meðan önnur lög þurfa nokkur rennsli til að maður nái þeim að fullu.

Á heildina litið er Sculpture flott rokkplata borin uppi af góðum lagasmíðum og frábæru sándi.