Óskar Bjarni: Rétti tíminn til að fara

Óskar Bjarni Óskarsson segist ekki kveðja Val alveg sáttur, en liðið tapaði fyrir Akureyri í kvöld og komst ekki í úrslitakeppnina í N1-deildinni. Hann tekur við liði Viborg í sumar.

"Þetta var leikur sóknanna í fyrri hálfleik en varnanna í þeim seinni. Stefán kemur í markið hjá þeim og vinnur leikinn bara. Hann ver þegar við vorum í kjörstöðum til að skora og það skildi liðin að."

"Við vorum slakir fyrstu 12-13 mínúturnar í sókninni en þetta lagaðist. Strákarnir voru að mörgu leiti góðir í kvöld. Strákarnir spiluðu með hjartanu og gerðu sitt besta og það er ekki hægt að biðja um mikið meira," sagði Óskar.

En var þetta ekki erfið vika, að peppa liðið upp í leik sem skiptir liðið engu máli, fyrir utan stoltið? "Jú ég viðurkenni það. Þetta var erfið vika fyrir mig og strákana. Ég vissi ekki alveg við hverju ég átti að búast. Auðvitað var áfall að komast ekki í úrslitakeppnina og að eiga ekki einu sinni möguleika fyrir síðustu umferðina en þetta er ekki slakasti vetur minn sem þjálfari og án þess að vera með neinar afsakanir þá var bara mjög erfitt að komast í undanúrslitin."

"Þetta hefur að möru leiti verið skemmtilegur vetur en við höfðum kannski ekki næga breidd. Kannski bjó ég bara ekki til nægilega mikla breidd. Ég er svekktur að vinna ekki en þetta er rétti tíminn til að fara," sagði Óskar sem heldur út til Danmerkur í sumar.

"Ég er búinn að þjálfa suma hérna, eins og Anton og Orra, frá því í sjötta flokki. Það er því fínt fyrir mig að hvíla mig á Val og fínt fyrir Val að hvíla sig á Óskari Bjarna."

"Ég mun sakna sjötta flokki karla mjög mikið samt sem áður! En ég tek bara við Val aftur, þetta er minn klúbbur, og þá tek ég strákana sem eru í sjötta flokki núna í meistaraflokknum," sagði Óskar kíminn.

"En ég er mjög spenntur að fara út. Viborg er frábær klúbbur og mín hugmyndafræði passar vel þarna inn. Þeir byggja mikið á yngri flokknum og hugsa til framtíðar."

En ætlar Óskar að lokka Valsara til Danmerkur? "Jájá, ég tek þrjá til fjóra Valsara með mér," sagði hann og hló við. "Neinei, það er búið að klára flest leikmannamál. Við erum að skoða þrjár stöður og það koma Íslendingar til greina í þær eins og aðrir, en ég vil helst að næsti þjálfari Vals hafi alla þessa snillinga og komi þeim í úrslitakeppnina að ári," sagði Óskar Bjarni.