Tinna: Missti sjálfstraustið | bjartsýn eftir sigurinn á Símamótinu

Tinna Jóhannsdóttir, atvinnukylfingur úr Keili, sigraði á Símamótinu sem lauk í gær á Grafarholtsvelli í Reykjavík. Þetta var fyrsti sigur Tinnu á Eimskipsmótaröðinni í sumar en hún hefur ekki náð sér almennilega á strik í keppnisgolfinu í sumar. Tinna vonast til þess að erfiðleikarnir séu nú að baki en hún mun á næstu mánuðum einbeita sér fyrir úrtökumótið fyrir Evrópumótaröð kvenna. "Þetta sumar hefur verið strembið, en ég er samt mjög bjartsýn á framhaldið. Og vonandi fer þetta að allt að smella saman hjá mér,“ sagði Tinna í gær eftir sigurinn í Grafarholtinu. "Ég missti einfaldlega sjálfstraustið, það voru ýmsir hlutir sem voru ekki í lagi, en ég er farin að sjá framfarir núna og slæ boltann miklu betur. Þegar það gerist þá kemur sjálfstraustið til baka. Ég ætla að reyna við úrtökumótið fyrir Evrópumótaröðina í desember en fram að því mun ég leika á fjórum mótum á Acces atvinnumótaröðinni,“ sagði Tinna en sú mótaröð er sú næst sterkasta á eftir Evrópumótaröðinni. "Ég verð mestmegnis erlendis fram að úrtökumótinu sem fram fer í Marokkó – þangað hef ég aldrei komið. Stefán Már Stefánsson og Þórður Rafn Gissurarson hafa báðir leikið á þessum keppnisvelli og ég hef fengið góðar upplýsingar frá þeim hvað varðar aðstæður í Marokkó. Tinna spilaði lokahringinn á sjö höggum yfir pari og lauk leik samanlagt á fimmtán höggum yfir pari. Heimakonan Ragnhildur Kristinsdóttir kom næst á nítján höggum yfir pari og þriðja var Signý Arnórsdóttir á tuttugu höggum yfir pari samanlagt. Efstu konur 1. Tinna Jóhannsdóttir, GK +15 2. Ragnhildur Kristinsdóttir, GR +19 3. Signý Arnórsdóttir, GK +20 4. Guðrún Brá Björgvinsdóttir, GK +22 5. Karen Guðnadóttir, GS +31 6. Guðrún Pétursdóttir, GR +33 7. Heiða Guðnadóttir, GKJ +35 8. Ingunn Einarsdóttir, GKG +39 9. Sara Margrét Hinriksdóttir, GK +42 10. Hansína Þorkelsdóttir, GKG +43