Tillögu Víkinga hafnað á ársþingi HSÍ

Tillögu Víkings um sameiningu tveggja efstu deildanna í karlahandboltanum var vísað frá á ársþingi HSÍ í dag. Þá var Knútur G. Hauksson endurkjörinn formaður.

Litlar breytingar voru gerðar á lögum sambandsins á ársþinginu. Þær breytingar sem lagðar voru fram og samþykktar voru að lagað var orðalag um fækkun og fjölgun í deild sem og að reglur vegna lánssamninga voru rýmkaðar líkt og segir í fréttatilkynningu frá Handknattleikssambandinu.

Velta sambandsins á árinu var tæpar 183 milljónir króna. Tap ársins var rúmlega 800 þúsund krónur. Þá er eigið fé sambandsins jákvætt um 21 milljón króna.

Kosið var um fjóra stjórnarmenn til tveggja ára. Þeir verða Árni Þór Árnason, Einar Einarsson, Guðjón L. Sigurðsson og Gunnar Erlendsson.

Þá vrou Hannes Karlsson, Ragnheiður Traustadóttir og Þorgeir Haraldsson kosin í varastjórn.