Greiðir atkvæði gegn tillögum stjórnlagaráðs

Jón Bjarnason, þingmaður Vinstri grænna og fyrrverandi ráðherra, ætlar að greiða atkvæði gegn frumvarpi stjórnlagaráðs á morgun. Hann er ósáttur við ákvæði í frumvarpinu um þjóðaratkvæðagreiðslur og takmarkanir á heimildum til útlendinga um kaup á fasteignum og atvinnufyrirtækjum.

Í núgildandi stjórnarskrá er ákvæði um að með lögum megi takmarka rétt erlendra aðila til að eiga fasteignaréttindi eða hlut í atvinnufyrirtæki hér á landi. Jón segist ósáttur við tillögur stjórnlagaráðs þess efnis að þetta ákvæði verði fellt brott. Jón segir að þessi tillaga stjórnlagaráðs komi fram á mjög sérkennilegum tíma, nú þegar umræða um fjárfestingar kínverjans Huangs Nubo hafi staðið sem hæst.

„Hinn stjórnarskrárvarði réttur til að beita takmörkunum á Nubo og aðra slika yrði þá horfinn og það er mjög sérkennilegt að vilja fella út þessa setningu nú akkúrat í þeirri umræðu þegar við erum að takast á við kínverjana, við erum að takast á við Evrópusambandið sem krefst þess að takmarkanir á fjárfestingum erlendra aðila verði fellt brott. Þá tel ég miklu mikilvægara að halda þessu ákvæði og herða ef eitthvað er," segir hann.

Þá er Jón líka ósáttur við tillögur stjórnlagaráðs þess efnis að ekki verði hægt að efna til þjóðaratkvæðagreiðslna um þjóðréttarlegar skuldbindingar, skatta og fjárhagslegt málefni. Slík takmörkun hefði haft mikil áhrif í Icesavemálinu. Hann segir þetta beint framsal á fullveldi.

„Þetta fellur jú að kröfum evrópusambandsins og samkvæmt þessu hefði þjóðin ekki getað kallað eftir þjóðaratkvæðagreiðslu um Icesavesamningana," segir Jón og bætir því við að hann geti ekki fallist á slíkar grundvallabreytingar á stjórnarskránni sem feli í sér framsal á fullveldi.