Sami Hyypia verður áfram þjálfari Leverkusen

Sami Hyypia, fyrrum leikmaður Liverpool, verður áfram þjálfari þýska liðsins Bayer Leverkusen næstu þrjú árin. Finninn Hyypia mun þjálfa liðið ásamt Sascha Lewandowski en þeir tóku við liðinu í apríl á þessu ári og náðu frábærum árangri.

Undir þeirra stjórn náði Leverkusen að landa 14 af alls 18 stigum sem voru í boði í síðustu sex umferðunum í efstu deild í þýska fótboltanum. Og Leverkusen endaði í fimmta sæti og náði Evrópusæti.

Hyypia er 38 ára gamall en hann lék með Leverkusen 2009-2011 eftir að hafa verið í áratug í herbúðum Liverpool. Hann lék 318 leiki með Liverpool og skoraði 22 mörk. Alls lék hann 105 landsleiki fyrir Finnland og skoraði þar 5 mörk.