Nýjustu tölur LV: Eystri Rangá með 70 laxa en opnar 1. júlí!!

Norðurá trónir á toppnum yfir mestu veiðina hingað til í sumar, eins og við mátti búast. Þar hafa veiðst 203 laxar. Það er þó ekki í samræmi við fréttir um laxagengd, en aðstæður eru veiðimönnum afar erfiðar eins og kunnugt er.

Þorsteinn Þorsteinsson á Skálpastöðum hefur birt nýjustu tölur veiðisumarsins inni á vef Landssambands veiðifélaga og margt er þar forvitnilegt að sjá.

Fimm ár hafa brotið 100 laxa múrinn, en auk Norðurár eru á þeim lista Blanda, Haffjarðará og Langá á Mýrum og Elliðaárnar. Brennan í Hvíta er enn að keppa við Þverá/Kjarrá með 91 lax en árnar hafa gefið 94.

Athygli vekur staða Eystri Rangár sem hefur gefið 70 laxa, en það er klakveiði sem um ræðir þar sem áin opnar ekki fyrr en 1. júlí! Það virðist eitthvað mikið í vændum á þeim bænum miðað við þessar tölur, það er víst.

En listinn hans Þorsteins talar sínu máli og hann má finna hér.

svavar@frettabladid.is