Búa sig undir ólíkar niðurstöður í Icesave

Össur Skarphéðinsson utanríkisráðherra segir að dómur í Icesave-málinu gæti fallið fyrir jól, hugsanlega í byrjun desember. Hann fundaði með Tim Ward, aðalmálflutningsmanni Íslands, í gær. Össur segir að í undirbúningi séu viðbrögð við mismunandi útkomum dómsins og brugðið geti til beggja átta.

„Ég tel þó að málflutningurinn í sumar hafi sýnt að við höfum ansi þétt rök varðandi það hvort ríkið beri ábyrgð á greiðslum innstæðutryggingarsjóðsins, og raunar á hið sama við varðandi þann þátt sem snýr að meintri mismunun Íslendinga gagnvart innstæðueigendum í Hollandi og Bretlandi. Málflutningsteymið okkar hefur staðið sig ákaflega vel og svo mun niðurstaðan koma í ljós. Við búum okkur undir hvað sem er.“

Össur undrast að mótaðilar hafi viljað láta reyna á ábyrgð ríkisins á tryggingum sjóðsins, en það gæti haft hrikalegar afleiðingar fyrir bankakerfi í löndum þar sem það stendur illa, á hvorn veginn sem dómurinn fellur.

„Ef við vinnum þá liggur fyrir að ríki ber ekki ábyrgð á lágmarksgreiðslum til innstæðueigenda, og það gæti haft ófyrirséðar afleiðingar í löndum þar sem staða bankanna er erfið. Ef við töpum þá gæti það sömuleiðis haft afleiðingar fyrir áhættu ríkja þar sem bankakerfið er í vanda, og haft bein áhrif á lánshæfismat þeirra. Þetta mál gæti því komið eins og búmerang aftan að mótaðilum Íslands.“- kóp