Einhliða upptaka ekki talinn valkostur

Ekki er hægt að gera ráð fyrir upptöku annarrar myntar á næstu árum og því er mikilvægt að tryggja trausta peningastefnu á grundvelli krónunnar. Þetta er sameiginlegt mat samráðshóps allra þingflokka um mótun gengis- og peningamálastefnu sem kemur fram í nýbirtu bréfi til Steingríms J. Sigfússonar, atvinnuvega- og nýsköpunarráðherra.

Hópurinn var skipaður í mars síðastliðnum en hann hefur haft til skoðunar möguleika þjóðarinnar varðandi gengis- og peningastefnu til framtíðar. Í hópnum eiga sæti Árni Þór Sigurðsson, tilnefndur af Vinstri grænum, Freyr Hermannsson, tilnefndur af Framsóknarflokknum, Illugi Gunnarsson, tilnefndur af Sjálfstæðisflokknum, Lilja Mósesdóttir, tilnefnd af Hreyfingunni og Þórunn Sveinbjarnardóttir, tilnefnd af Samfylkingunni, auk þeirra Gylfa Arnbjörnssonar frá ASÍ, Vilhjálms Egilssonar frá SA og Helgu Jónsdóttur sem falin var formennska í hópnum.

Eins og áður sagði er að mati hópsins ekki hægt að gera ráð fyrir upptöku annarrar myntar á næstu árum og er samstaða innan hans um að einhliða upptaka annarrar myntar komi ekki til álita. Hópurinn telur þess vegna mikilvægt að tryggja trausta peningastefnu á grundvelli krónunnar á næstu árum sem styrkja megi með þjóðhagsvarúðartækjum, ábyrgð í opinberum fjármálum og góðri hagstjórn.

Ekki er hins vegar samhljómur í hópnum um valkosti þjóðarinnar í gjaldmiðilsmálum til lengri tíma.

- mþl