Dæmigerða maríubjallan gerir sig heimakomna

Það er eitt og annað sem hlýnandi veðrátta hérlendis hefur í för með sér og nú bendir ýmislegt til þess að sjödeplan svonefnda, sem flestir þekkja sem klassísku maríubjölluna, sé að festa sig í sessi á landinu. Hingað til hefur hún reglulega borist til landsins með erlendum varningi en aldrei náð fótfestu.

Sjödeplan er líflegt skordýr og hvarvetna vel þokkað. Hún hefur meðal annars þótt sóma sér vel sem myndefni á jólakortum nágrannaþjóða okkar. Ýmsar tegundir eru til af maríubjöllum og þó sjödeplan hafi ekki þekkst hér á landi hefur frænka hennar, flikrudeplan verið hér landlæg.

Vegna hlýnunar síðustu misseri hafa ýmsir nýliðar úr skordýraríkinu gert vart við sig hér á landi - iðulega við litlar undirtektir Íslendinga. Við höfum litið á þá sem skaðvalda og fylgst áhyggjufull með landnámi þeirra. Nú lítur út fyrir að sjödeplan sé að gera sig heimakomna, enda hefur hún þrívegis fundist í görðum síðan í vor. Landnám hennar vekur hins vegar ekki sömu áhyggjur og koma annarra skordýra, enda verður hún seint talin til meinsemda. Þó hún sé mikið átvagl leggur hún sér einvörðungu blaðlýs til munns og því munu garðræktendur að öllum líkindum taka henni opnum örmum.

Frá þessu er greint á vef Náttúrufræðistofnunar Íslands.