30 gera athugasemdir við breytingar á Hjartagarði

Alls bárust borginni 32 athugasemdir um skipulag á Hljómalindarreitnum í miðborg Reykjavíkur. Þrjátíu þeirra fjalla að einhverju eða öllu leyti um Hjartagarðinn, þar sem breytingar á honum eru gagnrýndar.

Nýtt skipulag Hjómalindarreitsins var kynnt í september, en nýja skipulagið felur í sér minna byggingarmagn en áður hafði verið gert ráð fyrir auk þess sem færri hús verða rifin. Gert er ráð fyrir því að áfram verði torg á miðjum reitnum, en það verður mun minna en Hjartagarðurinn er nú. Hægt verður að reisa tjald yfir hluta torgsins fyrir uppákomur eða markaði.

Athugasemdir bárust frá eigendum staðanna Hemma og Valda, sem er við Laugaveg 21, og Faktorý, sem stendur við Smiðjustíg 4a og 6. Eigendur Hemma og Valda leggjast gegn tillögum um að opnunartími veitingahúsa verði skertur, telja að gert sé ráð fyrir of miklu byggingarmagni við Klapparstíg 30 og vilja að rýmið sé frekar notað til atvinnusköpunar og starfsemi en að fjölga íbúðum mikið. Eigendur Faktorý eru mótfallnir því að húsið sem þeir leigja skuli rifið samkvæmt tillögunni og telja að sem minnstu eigi að breyta á reitnum.

Þá barst athugasemd frá Hótel Klöpp sem segir fyrirhugaðar byggingar meðfram Hverfisgötu varpa skugga á lóð Klapparstígs 26 og þrengja mjög að lóðinni.

Aðrar athugasemdir snúa að Hjartagarðinum. Flestir virðast sammála um að þar sé á ferðinni einstakur garður sem ekki eigi að breyta.

thorunn@frettabladid.is