Pogba lofar að mæta ekki aftur of seint

Miðjumaðurinn Paul Pogba, sem fór frá Man. Utd til Juventus, er ekki agaðasti knattspyrnumaður heims en hann mætti tvisvar of seint á æfingu í síðustu viku.

Hann var fyrir vikið tekinn úr hópnum hjá Juve um helgina. Leikmaðurinn segist hafa lært af þessum mistökum.

"Þetta var rangt hjá mér og ég biðst afsökunar á sleðaskapnum. Ég sýndi félögum mínum vanvirðingu með þessari hegðun," sagði Pogba.

"Ég ætlaði mér alls ekki að mæta seint. Það var margt sem varð þess valdandi að ég mætti of seint. Ég gerði mistök. Ég mun sjá til þess að þetta komi ekki fyrir aftur."

Hinn 19 ára gamli Pogba er búinn að koma átta sinnum við sögu hjá Juve í vetur og skora tvö mörk.