Jón Gnarr verður bingóstjóri fyrir fatlaða íþróttamenn

Maður veit aldrei hverju maður á von á þegar Jón Gnarr er annars vegar, segir íþróttagreinastjóri íþróttafélags fatlaðra. Í dag ætlar borgarstjórinn að aðstoða við bingó til styrktar keppendum á Special Olympics sem fer fram í Suður-Kóreu í byrjun næsta árs. Það er íþróttafélagið Ösp og Special Olympics sem standa fyrir fjáröfluninni fyrir íslensku keppendurna sem eru þrír að þessu sinni. Þau Katrín Guðrún Tryggvadóttir, Þórdís Erlendsdóttir og Júlíus Pálsson. Helga Olsen, íþróttagreinastjóri Íþróttasambands fatlaðra, segir að á mótinu verði brotið blað í sögu íþrótta fatlaðra því nú mun Ísland í fyrsta skiptið taka þátt í parakeppni í listhlaupi á skautum. Hún býst við miklum fjölda á bingóið, sem fer fram í Hólabrekkuskóla klukkan tvö í dag. "Já, þetta hefur vakið gríðarlega mikla athygli. Svo við bara vonumst til að sem flestir mæti. Við erum með bingóspjöld fyrir 700 manns. Svo við bara vonum að sem flestir komi og sjái sér fært að styðja við frábært verkefni,“ segir hún. Og vinningarnir eru ekki af verri endanum. "Við erum með alveg glæsilega vinninga, þar á meðal flugferðir fyrir tvo með Icelandair til áfangastaða í Evrópu, ótrúlegar hótelgistingar, mat, gjafakörfur og gjafabréf. Og allt rennur þetta til keppenda í Special Olympics,“ segir hún. Bingóstjórinn að þessu sinni verður sjálfur borgarstjórinn í Reykjavík, Jón Gnarr. "Það er aldrei að vita með Jón Gnarr. En við erum auðvitað bara glöð og ánægð með það að borgarstjórinn sjái sér fært að styðja við verkefni Reykvíkinga. Þarna eru náttúrlega tveir Reykvíkingar innanborðs ásamt einum Mosfelling. Maður veit aldrei hverju maður á von á þegar Jón Gnarr er annars vegar, en við erum mjög ánægð með að hann vilji styðja við okkur,“ segir Helga.