Breytingar gerðar á þingflokki Samfylkingarinnar

Breytingar hafa verið gerðar á stjórn þingflokks Samfylkingarinnar. Oddný G. Harðardóttir er orðin formaður þingflokksins að nýju, Magnús Orri Scram er varaformaður og Ólína G. Þorvarðardóttir er ritari. Ásta Ragnheiður Jóhannesdóttir, forseti Alþingis tilkynnti þetta við upphaf þingfundar í dag. Þegar Oddný varð fjármálaráðherra um síðustu áramót lét hún af starfi formanns þingflokksins og Magnús Orri tók við. Þegar Oddný lét svo af embætti fjármálaráðherra á dögunum var þá ákveðið að hún tæki aftur við þingflokksformennskunni.