Telja Erp ná til unga fólksins

Rapparinn Erpur Eyvindarson stígur fram í nýju myndbandi og fræðir samlanda sína um sögu stjórnarskrár landsins og hvetur þá til að taka þátt í þjóðaratkvæðagreiðslunni næstkomandi laugardag. Myndbandið má nálgast á hlekknum hér að ofan en það er vefsíðan Áttavitinn.is sem framleiddi og birti myndbandið.

„Núna er komið að okkur. Laugardaginn 20. október fáum við að skrifa okkar kafla í þessari samfélagssögu," segir Erpur. „Við ætlum að segja Alþingi hvað okkur finnst um stjórnarskrá Íslands og taka þátt í að móta okkar eigið samfélag."

Nær til unga fólksins

Spurður hvers vegna Erpur var valinn til að segja frá íslensku stjórnarskránni bendir Viktor Orri Valgarðsson, sem kom að gerð myndbandsins, á að Áttavitinn sem vefsíða sé sérstaklega hugsaður til að ná til ungs fólks á aldrinum 16-25 ára.

„Við lögðum upp með að kynna þessar kosningar fyrir fólki á alþýðlegan hátt og sérstaklega reyna að ná til ungs fólks. Við hugsuðum einfaldlega þannig að Erpur gæti bæði skýrt þetta á lifandi og aðgengilegan hátt og náð sérstaklega til ungs fólks," segir Viktor. „Hann hefur líka áhuga á þessu máli og var til í að taka þetta að sér. Það er kannski engin ein ástæða fyrir því að hann varð fyrir valinu. Við töldum bara að hann væri góður í þetta."