Kapphlaupið um lífið fór fram í dag

Kapphlaupinu um lífið lauk í dag með því að lið Víðistaðaskóla í Hafnarfirði hljóp maraþonið á 2:10:52, sem er einungis um 7 mínútum lengri tími en heimsmetið í maraþoni, sem Kenýabúinn Patrick Macau á, en hann hljóp heilt maraþon á 2:03:38. Liðið hafnaði í 44 sæti af þeim 390 liðum sem nú hafa lokið keppni. Næstbestum tíma náðu nemendur Álfhólsskóla í Kópavogi, 2:12:59.

Barnamaraþonið Kapphlaupið um lífið fer fram í 40 löndum um allan heim í dag þegar rúmlega 20 þúsund börn í um 500 liðum hlaupa maraþon í boðhlaupsformi til að vekja athygli á baráttunni gegn barnadauða. Ísland tók í fyrsta sinn þátt í hlaupinu í ár sem nú er haldið í fimmta sinn.

Kenýska liðið frá Tunyai skólanum í Meru hljóp maraþonið í dag á 1:47:55. Það er langbesti tími sem náðst hefur í maraþoninu til þessa, en á síðasta ári hljóp lið frá Nderu í Kenýa á 1:51:52. Næst besti tíminn í dag er 1:54:19 sem lið í Nemakonde skólanum frá Harare í Zimbabwe náði.