Segir OR-skýrsluna uppfulla af rangfærslum

Guðmundur Þóroddsson, fyrrverandi forstjóri Orkuveitu Reykjavíkur, segir að skýrsla nefndar sem fjallaði um rekstur nefndarinnar sé uppfull af rangfærslum.

„Það væri að æra óstöðugan að elta ólar við allar þær rangfærslur og hálfsannleika sem finna má í 600 blaðsíðna skýrslu úttektarnefndar um Orkuveitu Reykjavíkur. Þó verður ekki hjá því komist að bregðast við þeirri túlkun fjölmiðla sem fram kom í gær, að upphafleg kostnaðaráætlun Hellisheiðarvirkjunar hafi verið 20 milljarðar kr. en hafi endað í meira en 70 milljörðum kr." segir Guðmundur í yfirlýsingu.

Guðmundur segir að þarna sé verið að bera saman tvo gjörólíka hluti því upphaflega talan sem vitnað sé í byggi á áætlun fyrir 40 MW raforkuframleiðslu og 100 MW hitaframleiðslu. Virkjunin í dag samanstandi af 303 MW raforkuframleiðslu og 133 MW í hita sem byggð hafi verið upp í 5 áföngum og verið ákveðnir af stjórn og eigendum Orkuveitunnar á mörgum árum. Að auki sé verðlag mismunandi með 10 ára mun á milli tímapunkta.

„Staðreynd málsins er sú að virkjunin á Hellisheiði er ein hagkvæmasta jarðvarmavirkjun sem byggð hefur verið í heiminum. Það er því full ástæða fyrir þjóðina að vera stolt af henni. Virkjunin er ein af meginstoðum tekna Orkuveitunnar og hagkvæmni hennar ein af ástæðum þess að tekist hefur að halda orkuverði jafn lágu og raun ber vitni," segir Guðmundur.