Vill að þingforseti upphefji virðingu Alþingis

Björn Valur Gíslason þingflokksformaður og formaður fjárlaganefndar vill að þingforseti víki Sveini Arasyni Ríkisendurskoðanda embætti, að minnsta kosti tímabundið.

Í bréfi sem Ríkisendurskoðandi sendi forseta Alþingis á dögunum ásamt útskýringum á því hvers vegna skýrsla um bókhaldskerfi ríkisins hafi verið átta ár í vinnslu, segist hann hugsi yfir þætti Björns Vals í málinu. Sveinn segir að Birni hafi verið kunnugt um skýrsludrögin þegar árið 2009 en hafi aldrei látið svo lítið að spyrjast fyrir um þau, fyrr en Sveinn hafi verið boðaður á fund fjárlaganefndar daginn eftir að Kastljósið fjallaði um skýrsludrögin.

„Ég var í fyrsta lagi undrandi á að ríkisendurskoðandi skildi grípa til þessa ráðs, að nánast væna mig um þjófnað á gögnum úr stofnuninni og að það hafi dregist um átta ár að skila þessari skýrslu. Það hefur hann ekki gert."

Björn Valur segir að með því að draga vinnu skýrslunnar á langinn hafi Ríkisendurskoðandi leynt Alþingi og nefndum þess mikilvægum gögnum.

„Ríkisendurskoðandi var í lófa lagið að upplýsa okkur um þetta í mörg mörg ár en gerði ekki. Það er ekki enn komið svar við þessu."

Björn Valur segir að Ásta Ragnheiður Jóhannesdóttir forseti þingsins hafi ákveðið að bregðast ekki við þeim trúnaðarbresti sem nú ríkir á milli þingmanna og Ríkisendurskoðanda.

„Kannski vonast hún til þess að það fenni yfir þetta eins og mörg önnur mál en henni mun skjöplast í því og það mun ekki verða gert."

Valgerður Bjarnadóttir formaður stjórnskipunar- og eftirlitsnefndar sagði í dag að réttast væri að Ríkisendurskoðandi víki tímabundið frá störfum. Björn Valur tekur undir það:

„Ég held það yrði öllum holt að stjórnandi stígi til hliðar tímabundið í það minnsta."