Breytinga þörf á húsnæðislánakerfinu

Forseti ASÍ segir að finna þurfi lausn á húsnæðislánakerfi landsins svo að meðalfjölskylda hafi ráð á að búa í meðalíbúð. Hann vill að ríkisstjórnin taki höndum saman með verkalýðshreyfingunni við að breyta kerfinu og lækka vexti.

Fertugasta þing Alþýðusambands Íslands hófst í dag og stendur fram á föstudag. Í setningarræðu sinni í morgun tók Gylfi Arnbjörnsson forseti sambandsins sérstaklega fyrir núverandi húsnæðislánakerfi.

„Og skiptir eiginlega engu hvort við skoðum óverðtryggðu vextina eða verðtryggðu vextina og er í raun orðið þannig að meðalfjölskylda á vart orðið ráð á því að búa í meðalíbúð lengur og þessu auðvitað verðum við að finna lausn á," segir Gylfi Arnbjörnsson, forseti ASÍ.

Hann segir eina lausn vera að fara hina svokölluðu dönsku leið þar sem lánveitendur hafa ekki vaxtaákvörðunarrétt heldur séu vextir ákvarðaðir á skuldabréfamarkaði.

„Það auðvitað gengur ekki að íbúðalánasjóður sé að leggja 30 prósenta álag á þá vexti sem hann er að fá á markaði."

Þá segir Gylfi verkalýðsfélögin vilja sjá meiri festu í gengismálum til dæmis með að taka aftur upp fastgengisstefnu sem myndi koma böndum á verðbólguna.

„Út af verðbólgunni og sveiflum í okkar gjaldmiðli þá er það ljóst að vextir hér eru það mikið hærri að íslensk fjölskylda er í 20 ár lengur að borga sitt húsnæðislán heldur en í nágrannalöndunum. Þetta teljum við vera alveg óviðunandi og viljum að stjórnvöld sameinist um það með okkur að þessu verðum við að breyta."