Var óheimilt að reikna vexti á láni Borgarbyggðar aftur í tímann

Arion banka var óheimilt að endurreikna vexti gengisláns Borgarbyggðar aftur í tímann samkvæmt vöxtum Seðlabankans. Þetta er niðurstaða Hæstaréttar Íslands, sem var kveðinn upp núna klukkan fjögur.

Forsaga málsins er sú að Borgarbyggð tók gengislán hjá Sparisjóði Mýrasýslu í árslok 2006 en síðar tók Arion banki yfir skuldbindingar sparisjóðsins. Í kjölfar dóma Hæstaréttar um ólögmæti gengislána var lán Borgarbyggðar endurreiknað aftur í tímann eins og hagstæðustu vextir Seðlabankans hefðu gilt um það í stað samningsvaxta. Í málinu krafðist Borgarbyggð þess hins vegar að samningsvextir yrðu látnir gilda þar sem afborganir sveitarfélagsins hefðu talist fullnaðargreiðslur. Vísaði Borgarbyggð í málflutningi sínum til þess að fullnaðarkvittanir hafi legið fyrir vegna afborgananna.

Héraðsdómur Vesturlands komst að þeirri niðurstöðu í vor að Arion banka hefði verið heimilt að endurreikna gengislán aftur í tímann samkvæmt vöxtum Seðlabankans þrátt fyrir að fullnaðarkvittanirnar hafi legið fyrir vegna afborgana. Hæstiréttur er ósammála niðurstöðu héraðsdómsins. Til grundvallar afstöðu sinnar hafði Hæstiréttur meðal annars dóm sem kveðinn var upp í máli tveggja hjóna, þeirra Sigurðar Sigurðssonar og Elvíru Mendez, sem stefndu Dróma af sambærilegum ástæðum. Hjónin unnu sitt mál þann 15. febrúar síðastliðinn.