"Arðgreiðslurnar varða fortíðina"

Á aðalfundi Vinnslustöðvarinnar í gær var samþykkt að hluthafar félagsins fái greiddan arð upp á 30 prósent af nafnverði hlutafjár eða um 830 milljónir króna.

Í fréttatilkynningu frá Vinnslustöðinni kemur fram að þetta samsvari um 13 prósent vöxtum af því fé sem hluthafar, sem eru rúmlega 250, hafa bundið í félaginu. Arðgreiðslan nemur um 45% af hagnaði eftir skatta sem er lægra hlutfall en á síðasta ári.

Greint var frá því í gær að Vinnslustöðin hafi ákveðið að segja upp 41 starfsmanni sem og að leggja uppsjávarveiðiskipinu Gandí VE.

„Ef að líkum lætur verður reynt að velta hluthöfum Vinnslustöðvarinnar upp úr því í opinberri umræðu að félagið greiði út arð á sama tíma og eigendur þess kvarta yfir háu veiðileyfagjaldi, leggja skipi og segja upp starfsfólki," sagði Guðmundur Örn Gunnarsson, stjórnarformaður félagsins, á fundinum í gær.

„Arðgreiðslurnar varða með öðrum orðum fortíðina: reksturinn í fyrra. Boðaðar samdráttaraðgerðir okkar varða hins vegar framtíðina: reksturinn á næsta fiskveiðiári og áfram."

Vinnslustöðin hagnaðist um jafnvirði 1.8 milljarða íslenskra króna á síðasta ári. Þá jukust tekjur um 12 prósent frá fyrra ári.

Í tilkynningunni kemur fram að félagið greiði 190 milljónir króna í veiðileyfagjald á yfirstandandi fiskveiðiári og „kemur til með að greiða ríflega fjórfalda þá upphæð á næsta fiskveiðiári eða um 820 milljónir króna."