Töluvert af laxi í Langá

Á annan tug laxa höfðu gengið laxastigann í Skuggafossi í Langá á Mýrum í fyrradag. Fyrir neðan fossinn má nú sjá þó nokkuð af laxi og útlitið gott fyrir opnun árinnar. Þetta kemur fram á vef Stangaveiðifélags Reykjavíkur (SVFR).

"Síðastliðin ár hefur Langá opnað með hvelli og allt útlit fyrir að svo geti orðið þetta árið," segir í frétt SVFR. "Fyrsti veiðidagur er 21. júní og sem fyrr eru það landeigendur sem fyrstir kasta fyrir laxinn í Langá. Ekki skemmir fyrir að opnunin að þessu sinni ber upp á Jónsmessustraumnum og því stórstreymt fyrstu daga tímabilsins"