Veiði

Yfir 1000 laxar gengnir í Elliðaárnar

Karl Lúðvíksson skrifar
Veitt í Fljótinu í Elliðaánum. 
Veitt í Fljótinu í Elliðaánum.  Mynd: www.svfr.is

Það er mikið af laxi að ganga í Elliðaárnar núna og er teljarinn nýskriðinn yfir 1.000 laxa en hann stóð nákæmlega í 1.008 löxum í morgun.

Teljarinn á þessum tíma í fyrra var undir 400 löxum svo það er greinilegt að það er mikill viðsnúningur í laxgengd milli ára. En af hverju eru veiðitölur þá ekki að endurspegla aukna laxgengd? Það er ósköp einföld skýring á því.

Veiðireglum var breytt eftir tilmæli frá fiskifræðingum og í kjölfar þeirra tilmæla var ákveðið að leyfa aðeins fluguveiði í ánni og að öllum laxi skyldi sleppt. Því var fagnað  af mörgum en það voru líka margir ósáttir við þetta breytingu um að mega ekki einu sinni hirða einn lax af vaktinni. Almennt eru menn sammála um að vernda þurfi þennan einstaka stofn í ánni en hann hefur oftar en einu sinni verið ansi hætt kominn.

Elliðaárnar eru mjög auðveiddar á flugu og efri svæðin fyrir ofan Hundasteina hafa lengi aðeins verið veidd á flugu. Það er hægt að taka lax á flugu í öllum veiðistöðum í ánni, það eina sem þarf er að læra tæknina til að gera það. 

Lægri veiðitölu má þess vegna skrifa að einhverju leiti á að eftir að maðkurinn hefur verið bannaður eru veiðimenn margir hverjir að kynnast ánni alveg upp á nýtt aðeins með flugu að vopni. Ekki skrifast lægri veiði á skort af laxi í ánni það er nokkuð ljóst.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.