Alexander verður líklega klár fyrir Spánverjaleikinn

Alexander Petersson gat ekkert spilað með landsliðinu í dag vegna meiðsla. Landsliðsþjálfarinn vonast þó til þess að hann geti spilað gegn Spánverjum á þriðjudag.

"Ég held og vona að hann verði klár í næsta leik. Mér fannst samt þeir sem leystu hann af gera það með sóma," sagði Guðmundur Guðmundsson.

Alexander hefur ekki verið sjálfum sér líkur í Serbíu og hefur sjálfur sagt að líkamlegt og andlegt álag sé ekki að gera honum gott.

Hann fékk nú nauðsynlega hvíld og kemur vonandi sterkur til baka gegn Spánverjum.