Ögmundur hefur ekkert heyrt um samninginn um Grímsstaði

Ögmundur Jónasson innanríkisráðherra hefur ekkert heyrt um samning sem gerður verður við kínverska fjárfestinn Huang Nubo og til stendur að ræða á fundi ríkisstjórnarinnar á föstudag. Samkvæmt samningnum, sem greint var frá í kvöldfréttum RÚV, munu sveitarfélög ræða á Norðurlandi og Austurlandi kaupa landið og leigja Nubo það. Samningurinn verður til fjörutíu ára og mun Nubo greiða fyrir leiguna fyrirfram. Þannig verða kaupin á landinu fjármögnuð.

„Ég hef ekkert heyrt um þennan samning og þá verður þetta væntanlega kynnt fyrir mér og öðrum á fundinum," segir Ögmundur sem telur að það verði fróðlegt að fá upplýsingar um þetta mál. „Ég hef verið að bera mig eftir því en það hefur enginn haft frumkvæði að þv´að kynna mér eða innanríkisráðuneytinu eitt eða neitt," segir Ögmundur, en bætir því við að það hafi borist óljósar fréttir í gegnum iðnaðarráðuneytið og í gegnum fjölmiðla að unnið væri að samningum.

Þegar Huang Nubo bauðst til þess að kaupa Grímsstaði á Fjöllum í fyrra lá fyrir að hann þyrfti undanþágu sem heimiluðu honum slíkar fjárfestingar því almenna reglan er sú að útlendingar utan EES svæðisins megi ekki kaupa jarðir á Íslandi. Nubo sótti um undanþágu til innanríkisráðuneytisins en þeirri beiðni var hafnað.