Þrír arftakar helst nefndir

Jóhanna Sigurðardóttir segist enn ekki hafa gert það upp við sig hvort hún ætli að sækjast eftir endurkjöri sem formaður Samfylkingarinnar. Fari svo að hún hætti í pólitík eru þrír arftakar helst nefndir.

Á flokkstjórnarfundi í gær sagði Jóhanna þetta, þegar hún var spurð út í framtíðina.

„Nei ég hef ekki tekið ákvörðun um það. Allt hefur sinn tíma í pólitík, líka þetta."

Þrátt fyrir að enn sé allt óljóst í málinu telja margir heimildarmanna fréttastofu innan flokksins líklegast að Jóhanna, sem verður sjötug í október og hefur setið á þingi frá árinu 1978, muni ekki sækjast eftir formannsembættinu á landsfundi sem áformaður er í byrjun næsta árs. Áður en til hans kemur heldur flokkurinn prófkjör í október eða nóvember.

„Ég hef sagt það um mína flokksmenn að ég láti vita um það í góðan tíma áður en prófkjörin skella yfir," segir Jóhanna.

Árni Páll Árnason þingmaður og fyrrverandi ráðherra Samfylkingarinnar, sem lengi hefur verið orðaður við framboð til formanns, segir í viðtali við DV um helgina að hann sé algjörlega sannfærður um að þörf sé á sterkri og skýrri framtíðarsýn sem muni leiða landið og flokkinn í rétta átt. Hann segist þó ekki geta tekið ákvörðun um framboð til formanns strax, hann telji eðlilegt að heyra fyrst um áform Jóhönnu til framtíðar.

Fari svo að Jóhanna hætti í pólitík hafa tveir arftakar, auk Árna, helst verið nefndir síðustu mánuði. Guðbjartur Hannesson velferðarráðherra og Katrín Júlíusdóttir verðandi fjármálaráðherra.

Katrín var gestur Sigurjóns Egilssonar á Sprengisandi í morgun og þar var hún spurð hvort hún muni gefa kost á sér til formanns ákveði Jóhanna að hætta:

„Jóhanna Sigurðardóttir er ennþá formaður Samfylkingarinnar. Ég fann fyrir mjög miklum stuðningi við að hún verði áfram á fundinum. Hún hélt mjög innblásna ræðu þannig að ég ég segi nú bara, af hverju ætti Jóhanna að hætta núna þegar við sjáum til sólar? Hún er búin að vera ofan í kjallara að moka kolageymsluna. Nú er hún orðin skínandi hrein og fín og af hverju fær hún ekki að koma upp og dekka borðið?"