Sverre: Við erum bara nokkuð góðir

Sverre Jakobsson var í mikilvægu hlutverki gegn Frökkum í kvöld en varnarleikur íslenska liðsins hefur verið með eindæmum góður í leikjum Íslands á Ólympíuleikunum til þessa. Það var engin undantekning í kvöld þegar að strákarnir okkar unnu magnaðan sigur á Frökkum.

„Við höfum beðið eftir þessu í ansi langan tíma. Stundum snýst þetta bara um að snúa trúnni sér í hag og bera ekki of mikla virðingu fyrir andstæðningnum. Við höfum reynt að vinna í því lengi og með þessum sigri í kvöld tel ég að við höfum tekið stórt skref í rétta átt," sagði Sverre.

„Þetta var hrikalega erfitt en að leiknum loknum er tilfinningin rosalega sæt. Sigurinn er flottur fyrir okkur, flottur fyrir hugarfarið og flottur fyrir framhaldið."

„Við megum samt ekki gleyma því að þessi sigur gefur okkur bara tvö stig og mögulega aðeins auðveldari andstæðing í 8-liða úrslitum. Við verðum því að nota þennan sigur í kvöld - við verðum að setja kassann út og segja að við séum bara nokkuð góðir. Við ætlum að fara langt."

Strákarnir voru duglegir að fagna hverjum einasta áfanga í kvöld - ekki bara mörkunum heldur einnig þegar að þeir náðu að stöðva sóknaraðgerðr Frakkanna, sem gerðist ósjaldan.

„Við verðum að halda okkur á tánum og við notum allar leiðir til þess. Ef maður nær að gera eitthvað gott í vörninni þá verður maður að sýna fyrir sjálfum sér og öllum öðrum að maður ætli að halda þessu áfram. Allt svona smitar út frá sér - þegar ég sé Didda fagna við hliðina á mér get ég ekki annað en brosað og sett upp hnefann fyrir hans hönd."

„Það eru þessir litli hlutir sem gerir okkur að liði og skipta svo miklu máli. Að ná hnefa í andstæðinginn er eins og að skora gott mark."

Strákarnir fengu sjö brottvísanir í kvöld gegn fjórum frá Frökkum. Það hefur verið helsta vandamál okkar á þessu móti og Sverre segir að það þurfi að bæta úr þessu.

„Einhvern tímann mun það koma í bakið á okkur. Við getum ekki alltaf treyst því að við náum að standa þetta af okkur. En vörnin var góð í dag og nú gildir bara að halda áfram. Við fögnum þessu í kvöld en eftir það hefst undirbúningur fyrir framhaldið. Þessi sigur gefur okkur ekkert nema að við höldum áfram á þessari braut."