Ólafur: Árangur okkar engin tilviljun

Landsliðsfyrirliðinn Ólafur Stefánsson var með báða fætur á jörðinni eftir sigurinn í kvöld og minnti á að það er enn mikið eftir af þessu móti.

Ísland vann í kvöld Frakka á glæsilegan máta og þar með sinn fjórða sigur í röð á Ólympíuleikunum í London. Liðið trónir á toppi A-riðils með fullt hús stiga og á einn leik eftir - gegn Bretum á mánudag.

„Því miður getum við bara leyft okkur að njóta þessa sigurs í kvöld en svo er það bara búið," sagði landsliðsfyrirliðinn.

„Við vorum að brjóta ákveðinn ís með þessum sigri í kvöld. Sýndum að árangurinn okkar er engin tilviljun heldur að við erum bara nokkuð þéttir."

„Einu vandræðin sem við lendum í er þegar við verðum einum færri. Annars erum við nokkuð slípaðir og flottir og verðum við að kunna þá list að vera efstir, með kassann úti og verða svo enn betri eftir því sem sjálfstraustið eykst."

„Við fáum nú lið sem er í fjórða sæti í hinum riðlinum í 8-liða úrslitum en það er alveg ljóst að ein sekúnda af vanmati fyrir þann leik getur verið mjög skaðlegt."

„Ég vil þó helst ekki talað mikið um það. Nú túttnum við út af öllum þessu góða sem við gerðum."

Ólafur bendir á að það hafi verið ýmsilegt við leik íslenska liðsins sem hægt er að bæta. „Við gerðum of mikið af tæknifeilum í dag og Bjöggi bjargaði okkur nokkrum sinnum vel í markinu. Vörnin var samt mjög þétt og auðvitað margt gott við þetta."

Hann segir að í einu skiptin sem íslenska liðið gefi færi á sér er þegar það missir mann út af og lendir í undirtölu.

„Þá vill takturinn detta úr liðinu og andstæðingurinn reynir að ganga á lagið. Auðvitað eru varnarmennirnir okkar að sinna mjög erfiðri vinnu og það er ekkert létt að vera alltaf réttu megin við strikið, þó svo að margir dómarnir hafi verið vafasamir."

„Þetta var góður sigur fyrir sjálfstraustið. Menn geta talað um sæta sigra en það er bara svo skammvinnt. Nú höldum við áfram því í svona móti hefur maður engan tíma til að njóta sætra sigra."